Yo, Haimiko, tengo kaminado milyares de pazos sin un lugar fikso, giado por la luz ke se asoma al fin de kada kaye estrecha. A vezes me demando si akeya bryantez es una membransa o un abrigo.
En Tarazona, la yamada Djudería m’amostró ke la estoria no se bifurka: se enkarna en kada piedra, en kada persona i en kada nombre ke siempre se yeva.
Aki, ande las kayes empinadas paresen kerer tokar el syelo, bivyeron mas de setenta famiyas djudyas entre los sieklos XII i XV, dando vida a un maale vibrante. Su memoria kedó kozida en las fachadas, en los muros amofinados i en la dispozisión laveríntika de sus kaminos.
Kamini por la Rua Alta de Bécquer —antes konosida komo la Kaye de la Sinagoga— i sintí el eko de bozes ke se dizolven en la briza. Los nombres de akeyas kayes, oy en dezuzo, eran rutas de komersyo, de selebrasyón i de kotidianitá.
La aldjama djudia de Tarazona no fue solo un kartier: fue un sentro de kultura, de pensamiento i de konvivensya, afilú si su destino sería trágiko poko antes de 1492.
—¿Krees ke pardonar sinifika ulvidar? —me demandó una vez Shmuel, un estoryador ke avrió para mí karpetas amarilyentas, enchidas de dokumentos antikos.
—No —arespondí—. Pardonar es achetar ke lo ke no fue djusto sigue siendo parte de mozotros. No lo anula, ma lo transforma en memoria partajada.
Shmuel sonriyó, komo si uviera sintido esa repuesta en otras almas enkietadas. Me disho ke la Gurash de los Reyes Katólikos no fue solo un echo polítiko, ma un golpe mortal a una forma de vida tejida kon nombres, sonidos i aromas kotidyanos.
En 1492, munchas famiyas desharon sus kaza, sus ofisyo i sus rituales en un solo akto de partida forsada. Alora, akodrí lo ke avía meldado: el edikto no solo demandó abandonar kazas i posesyones. Demandó desprendersen de identitá, de pertenensya, de estoria. Yo, Haimiko, sintí akel danyo en kada eskalón de piedra ke desende verso la Plaza de la Djuderia Vieja.
—¿I ke sintes kuando kaminas por estos senderos? —me tornó a demandar Shmuel una tadre, myentres el sol se dezlizava sovre las Kazas Enkolgadas.
—Ke ay karas atras de kada arko. Ke el pardón no es solo serar puertas, ma avrir ventanas verso lo ke dainda no tenemos komprendido.
Komprendí ke pardonar no es un akto verso ken se fue, ma verso mozotros mizmos. No djuzgar no es demisión, ma rekonosimiento: lo ke bivimos, mizmo lo indjusto, forma parte de muestra trama espiritual. Ansina komo la komunitá djudia de Tarazona no tornó dospues de 1492, tampoko no puedemos efasar sus memoria si keremos integrar lo ke fue i lo ke semos agora.
Enfrente de las Kazas Enkolgadas, ke desafían la gravitá, imajiné bozes de merkado, de ambezamiento i de selebrasyones ke ya no se sinten. Kazas ke rezistieron sieklos, afilú si sus djente no tornó nunka mas.
—Haimiko —me disho Shmuel—, a vezes uno se demanda si las vidas ke ya no están vedraderamente se fueron.
—No se fueron. Están aki —le arespondi—, en kada piedra ke no ulvida su pezo.
Akeya manyana, kaminando solo por la Kaleja de la Djuderia, sintí la prezensya de una komunitá ke deshó su pista no solo en el espasyo fiziko, ma en la manera en ke la sivdad rekodra i areviva su pazo.
La Djuderia de Tarazona, oy un kondjunto de kalejas estrechas, es la marka viva de una estoria ke no puede relegarse al ulvido.
Me akodrí de unos biervos nasidos al empesar este viaje: sanar la mente no es efasar el pasado, ma resinifikarlo. La Gurash de 1492, komo otros echos de violensya i separasión, no puede ser negada. Ma su rekodro puede transformarsen en fuerza para fraguar empatia i puentes.
Mientres el sol deklinava, komprendí ke la estoria djudia de Tarazona no se eskapa kon el akto de partir. Sige en la kara de ken bushka entender, en las bozes ke komparten konsejas, i en la memoria kolektiva, komo un río soterráneo ke fluye debasho de los adokines.
“No te piedras en la nostalja”, me disho Shmuel. “Uza la memoria para topar senso en tu prezente”.
I ansina eskriví:
La estoria es un río ke no se detiene.
No guadro renkor.
Lo indjusto no fue mi eleksyón,
ma mi repuesta puede ser achetasyón i aksión konsyente.
Kamini fuera del kartier djudio respirando la meskla de lo ke fui i de lo ke so agora. Tarazona no es solo un lugar: es una komunitá de tiempos superpuestos, de bozes ke dainda demandan ser sintidas i de estorias ke mos ambezan a kaminar sin separasyón.
